غزة بلا كهرباء بلسان طفلة لم تتعدى العشرة ايام على ولادتها

فاكرين يا جماعة لما زمان قبل ما إمي تولدني أنا ؟؟؟
أظن فاكرين ، لأني أنا فاكرة ..
المهم من هداك اليوم والكهربا بتقطع وبتيجي ، بتقطع وما بتيجي..
وأيام ما اخدوا الولد يلي اسمو شاليط ، قاموا قطعوها وبقيوا ساحبينها طول الصيف ، أيامها يعني قبل كم من سنة .
وبعدها بحجة الحزين هادا عيشونا بسواد كم من سنة بس ، مش كتير يعني .
المهم مشينا ومشينا ووقفنا عند الحرب 21 يوم بدون كهربا ، كانت أمي تطلع عالأسطوح ونطلع معها من شان نطبخ عالفحم ونغسل على ايدينا ويلي بدو يتحمم ، يدبر حالو بشوية مية مسخنة على الفحم ، يعني أحسن إلك ما تستخدمها لأنها بتخليك أكثر قذارة ، بس الحمد لله كان شهر يناير عز البرد ومن شان هيك ، الله سترنا وما عفنّا ..
بعد هالقصة الصغيرة تبع الحرب ، صاروا يجيبوا الكهربا يوم ويقطعوها اتنين ، واحنا الغلابة بنحكي الحمد لله يا رب.
ومشينا ومشيت هالايام وعيني ذابوا من الشمعة ، وادرسوا كيميا ورياضيات وفيزيا ، وموتوا يا غلابة من شان تاني يوم تقدموا اختبار "ما بينحل " ، والله صبّرنا و اخدنا امتياز في الفصل الأول .. ، إجت الاجازة النصفية وقلت بدنا نتنفس قبل ما يبدأ الفصل التاني ، راحوا اولاد ال .... شفطوا كل السولار ، يعني كانت تقطع 8 ساعات بالأول ، بس لما اجت الاجازة "كلها اسبوعين" صاروا يجيبوها 8 ساعات ...
يا ربي ... بدأ الفصل التاني ورجعنا للشمعة ، ورجعوا تكرّموا علينا ، وصاروا يقطعوا الكهربا بس 8 ساعات بالنهار ، أيامها كنّا قبل ما ننام ولمّا نصحى ، نبوس أيدينا وجه وقفا على هالنعمة ، يعني 8 ساعات تقطع الكهربا في اليوم ، عز ما حد وصل لإلو ..


المهم ، مشينا شويتين ، وخلص الفصل الدراسي التاني وأخدت امتياز "غصب عنك يا اسرائيل" ،وقلت يلا يا سوسو اجت الاجازة الكبيرة 3 شهور ، من شان أنسى كل تعب الدراسة والواحد يعني يعيش شوية . وشو هالصيف يا جماعة ، أعوذ بالله من نار جهنم ، تقول الشمس نازلة كم من سنتيمتر عن موقعها ولا ما بعرف مين كابب على غزة حر ...


المهم ، هالاجازة فرفشة غير شكل ، بدنا نعمل حملة اسمها " غزة غير .. صيف 2010" ، في اول الاجازة كنا على نظام انو تقطع 8 ساعات في اليوم ، ومتل ما قلتلكم احنا راضيين ومبسوطين بهالشغلة ، وإذ بهم يبدلوا النظام ، وتسير يا حبة عيني تيجي الكهربا عندنا 5 ساعات باليوم ، وباقي اليوم بنقعد نقصقص بزر ، والبزر غالي والله هاليومين .
وطول اليوم الّي بيتحول كل شي فيه لأشغال شاقة بالحر وبدون كهربا ، بتلاقي إمي بتحكي " حسبي الله عليك يا فياض ، الله ينتقم منك يا عباس ، تجيك من عند الله يا مبارك ، يحرقهم بنار جهنم باراك وتنياهم يارب " بتغيب شوية ولما يتأزم الوضع :" الله ينتقم من كل الظلم ، تتلقاها بمالك وبصحتك وبعيالك يا مبارك ، الله يقطع رقبتك يا فياض متل ما قطعت الكهربا يا حرامي السولار والغاز " وعلى هالموال...


المهم .. اليوم موعد الكهربا تيجي الساعة 12 الظهر ، أنا من قبل بساعة قاعدة وحاطة ايدي على خدي وبأستنى الساعة تسير 12 ، ولخيبة الأمل سارت 12 ، وكل اهل البيت قالوا :أمرنا لله ، شكلهم راح يجيبوها 5 دقايق باليوم ، بردو خير وبركة ما حد زعلان ، وفجأة وبدون مقدمات والساعة 12 وربع ، شفنا ضو الغرفة بيضوي ، والله لا يوريكم ، حركة البيت تغيرت والأصوات تعالت :"يا بنات يا اولاد ، يلا بدي أغسل هاتوا ملابسكم " ، " واخيرا بدي أتحمم يلا صفوا طابور شوية والهيتر بيسخن المي " ،" هلأ هلأ يا محمد بتخلي التلاجة مليااانة مية من شان الواحد يشرب شوية مية متلجة " ، " لحقوا يا جماعة افتحوا التلفزيون تنشوف الاخبار ، وبعدها نشوف آخر أخبار طيور الجنة وكراميش " ........يعني وهيك الوضع ..
الحمد لله انا راح أرتاح 5 ساعات هلأ لأنه لما يرن الجرس بأفتح من هون ، مش راح انزل الدرج كله من شان أفتح ، وغير كده لو تشوفو العز يلي أنا فيه ، أنا قاعدة ومشغلة المروحة ، والله يا جماعة الله كريم كتير ..


يعني هلأ الساعة 2 وربع كمان ساعتين ونص بتروح الكهربا وربكم أعلم ايمتى بتيجي ولّا كمان كم يوم بيتجي ، كل هذا بعلم الغيب ...


عرفتوا قصتنا ؟؟؟
بالآخر بحكي
لو قطعوا عنا الضي لو عطشت غزتنا المي ، إلّي بموت بأرضه حي ، ويا ويليو إلّي بيرضى العار
وبحبك يا غزة وبموت فيكي ، ولو قطعوا عنا الهوا مش بس الكهربا والمي ، احنا راضيين وصامدين لآخر نفس فينا ، والله ما بيفوتوا غزة إلا على جثثنا ، يا احنا يا هم ... والزمن طويل ، ومتل ما بتقول امي دايما : الظالم له يوم ، ودولة الظلم ساعة ودولة الحق لقيام الساعة ، ويمّا ما في وضع بيدوم .


وأنا بدي أقوم بلكي ألاقي مية متلجة ، وأخلي مجال لغيري ليتسخدمو الجهاز ..


تعليق..


أولاً .. هذه المرة الأولى التي أستخدم فيها العامية في الكتابة ، فأعتذر لجميع القرّاء ، وعلى من لم يفهم شيء من هذه اللكنة الغزاوية بأن يخبرني وأنا سأساعده ..
ثانياً... هذه التدوينة إنما عبّرت عن واقع أحياه أنا وكل من يقطن في هذا الحصار منذ لحظة الميلاد ..
انتظرت الكهرباء كثيراً ، بالرغم أن غيابها الطويل جعلنا لا نفتقدها كثيراً ، أصبحنا قادرين عن العيش بدونها بالرغم من شدة احتياجنا لها ، قد يبدو الكلام متناقض ، ولكن عليكم أن تعتادوا على عالم المتناقضات هذا....
ثالثاً .. بالنسبة لدعوات أمي على فياض وعبّاس فإنها تستند لدلائل ووثائق كشف عنها وزير الطاقة ، يمكنكم المتابعة على "فلسطين الآن " عن هذه الفضيحة التي تدين فياض شخصياً بانقطاع الكهرباء..