الثورة فهمانى !

الثورة فهمانى !
***********

ثورة و فوق الجبين ثورة
حالفة لتعود و معاها نشان
تهديها لقبر الشهيد برهان
لكل مخلص للبلاد راية
كفاحة منقوش عالوجوه آية
و الحق جواها كما القرآن
تترتل حروفه فى الميدان أنغام
و صرخة أم الشهيد تدوى
صداها فى القلوب بركان
بتحرك الصخر فى الجبال أطنان

*********
ثورة بوجه الزمان و العناد
ضد الطغاة و الفلول جاية
ثورة رجالها بالميدان أوتاد
ما يهمهم موت و لا وشاية
تبتر جذور أوغاد
و لا ولاية و لا وصاية
و تقرر مصيرها فى ثبات
و ترسم للولاد غاية

*********

مفيش رجوع للبيوت تانى
و الثورة واقفة تعكس ملامحى
شاهدة على حالى و فهمانى
و لو قدر زمانى أكون جثة
خدوها و ازرعوها
يطلعلها سارى
دليل للحياة غالى
شاهد على قبرى
كرامة فى التاريخ عالى
و دمى للرجال سامى
مداد يكتب حروف من نور
لكل رايد يكون
حدوته تحكيها الليالى

********
أنا راجع مهما كان الويل
أنزع حقوقى من فلول الليل
و الفجر واقف بعيد بيستنى
أحكام الطبيعة و زوال الليل
و الشمس دوارة صبية بتتباهى
بتضحك للبشر و تقول :
المهر كان غالى وانتم على بالى
ما غبتوا عنى فى يوم
لكن حكمته فيه ما ارجع إلا بهدية
لكل من ضحى و حلمه كان فيه !

*********
و الثورة من بعيد واقفة كأنها مراية
تعكس خيوط الشمس فى جفونى
بتقوللى لسه على عهدى و وعودى
لكن بيفضل شيئ جواك و جوايه
و عشان نعيد القول حسسنى بوجودى
و بص فى الميدان شوف اللى راح منك
قبل ما يفنى الكون بشرودك و بشرودى !!

( مصطفى المنشاوى )